Nepali Khabar

08:00 PM - 08:30 PM

Tuesday, September 26 2017, 20:22 | मङ्गलबार १०, असोज २०७४ २०:२२
कक्षामा अध्ययनरत करिष्मा मानन्धर भन्छिन्– फिल्ममा त ‘डक्टर’ नै गरेँजस्तो लाग्छ

मङ्गलबार, २० भदौ २०७४| Nirmala Khadayat
कक्षामा अध्ययनरत करिष्मा मानन्धर भन्छिन्– फिल्ममा त ‘डक्टर’ नै गरेँजस्तो लाग्छ

एफएम संवाददाता
धनगढी, २० भाद्र ।

अभिनेतृ करिष्मा मानन्धर त्रिवेणी स्कूल मैतीदेवीको कक्षा ९ की विद्यार्थी हुन् ।  धेरैलाई अचम्म लाग्न सक्छ । उनी कक्षा ८ पास गरेर अहिले कक्षा ९ मा अध्ययनरत छन् ।

“अहिले म साना साना भाइबहिनीहरुसँग पढ्ने काममा व्यस्त छु,” मानन्धरले सोमबार बेलुकी पत्रकारहरुसँग भनिन्, “म अहिले स्कूल जान्छु भन्दा कति महिलाहरुलाई प्रोत्साहन पनि हुन्छ । अहिले म कक्षा ९ मा अध्ययनरत छु । कक्षा ८ मा भर्ना भएर परीक्षा दिएकी हुँ ।”

करिष्माले नियमित कक्षा जान नपाउँदा खबर गर्ने गरेको पनि जानकारी गराइन् ।

“कहिले पार्टीको काममा व्यस्त, कहिले फिल्मको काममा,” आफ्नो व्यस्त दैनिकीका बारेमा जानकारी गराउँदै भनिन्, “दैनिक कक्षा लिन नसके पनि परीक्षामा राम्रो गर्दिरहेछु भन्ने पुष्टि भैसकेको छ ।”

उनले कक्षा ८ को परीक्षा ग्यालेक्सी पब्लिक स्कूलबाट दिएको सुनाइन् । “म १४ वर्षको उमेरदेखि नै फिल्म क्षेत्रमा लागेँ,” उनले भनिन्, “१४ वर्षको उमेरदेखि नै पढाई छाडिदिएँ । फिल्म क्षेत्रमा ३० वर्ष काम गरेँ । मैले त त्यो क्षेत्रमा डक्टर नै गरेँ जस्तो लाग्छ ।”

उनी आफू पार्टीमा लागेपछि पढाइको महत्व थाहा पाएको पनि बताइन् ।
“हुन त अहिले मैले नयाँ फिल्म बनाउँदैछु,” उनले भनिन्, “म फिल्मको काममा धेरै नै व्यस्त हुन्छु होला तर दैनिक क्लास लिन नसके पनि परीक्षा त दिन्छु नै ।”

उनले आफ्नो पढाइले धेरै महिलालाई प्रोत्साहन हुन सक्ने धेरैपटक सुनाइन् ।

मानन्धर अहिले नयाँ शक्ति पार्टीमा आवद्ध छन् । नयाँ शक्ति धेरैले छाडिसके तपाईँ के गर्नुहुन्छ ? भन्ने प्रश्नमा उनी भन्छिन्–म नयाँ शक्ति छाडेर कतै जादिनँ । किनकी हामीले यहिँ नै केही सक्छौं ।”

उनले अन्य पार्टीमा अवसर खोजेर बाहिरिनेहरु नै बढी भएको बताइन् ।

बाह्रखरीबाट साभार गरिएको ।

प्रतिकृया दिनुहोस